Dia Gsondheits-Knolla

"Liaber [NAME]" 
Mit 60 Johr fangt's Rentnerlebe o,
mit 60 hat m'r Spaß au dro, 
60 Johr passet grad en oin Kiebel
grad wie do dia 60 Zwiebel. 
Mit 60 muaß m'r an sei Gsonheit denka 
ond mit Zwiebla läßt sich dabei vieles lenka! 
Drom [NAME] eß Zwiebla ond sei g'scheit, 
denn Zwiebla helfet Dir für die kommende Zeit. 
Die beschte Zwiebla, des isch klar, 
gibts en Ungarn, ehrlich wohr - 
doch kannsch Du au zom Aldi laufa 
ond dort welche aus Holland kaufa. 
M'r kann se hacka oder reiba, 
oder au en Scheiba schneida. 
Du kannsch se brota oder schwitza, 
oder en a Sößle schnitzla. 
Hosch mol selles, fehlt Dir dees, 
werd bei Gott net glei nervös. 
Des macht älles garnix aus, 
hosch Du Zwiebla g'nug em Haus. 
[NAME], fehlts am Laufa, hoschs em Rücka, 
kosch de nemme richtig bücka. 
Hosch kromme oder feuchte Flossa 
s'ganze G'sicht voll Sommersprossa. 
Hosch Niera- oder Gallastoi, 
am linka Arm a Überboi, 
hasch a Aisa oder Läus, 
siehsch manchmol weiße Mäus, 
des macht älles garnix aus, 
hosch Du Zwiebla g'nuag em Haus. 
[NAME], schtehn Dir d'Ohra ab, send d'Auga lätz, 
hosch an de Fiaß en Haufa Blätz, 
kannsch net schlofa, mogsch nix essa, 
fangsch langsam o, dei Sach z'vergessa, 
hosch Du Warza oder Wanza, 
oder so en Druck em Ranza, 
hosch Rheuma, Bauchweh, Seitastecha, 
muasch huaschta, koppa oder brecha, 
des macht älles garnix aus, 
hosch Du Zwiebla g'nuag em Haus. 
Hosch g'schwollene Mandla, bluatet d'Nos, 
a paar Schnokastich, a schwache Bloas, 
hosch Hoarausfall oder Hühnerauga, 
Dei Zahnprothes will nix mehr tauga, 
hosch en en Blenddarm wo De druckt, 
bisch miad oder schlapp, muasch dauernd gähna, 
scott'sch uf d'r Friedhof- ond brauchsch Träna, 
des macht älles garnix aus, 
hosch Du Zwiebla g'nuag em Haus. 
Hosch en Kopf- schier zom Verrecka, 
koasch d'Zwiebla henter d'Ohra stecka. 
Fehlt zum Sex Dir Luscht ond Kraft, 
nemmsch a Gläsle Zwiebelsaft. 
Hosch Mundgeruch, der and're stört, 
eß Zwiebla, weil des betört. 
Hosch z'viel g'soffa- s'erscht Gebot 
eß a kräftig's Zwiebelbrot. 
Hosch z'wenig tronka, ischs au wurscht, 
eß en Zwiebelbolla - des gibt Durscht. 
[NAME], s'wird behauptet, ond mit Grond, 
Zwiebla send net vornehm - aber g'sond . 
Drom [NAME], dia 60 Gsonheits-Knolla 
sollet Dir älle Tag Guat bekomma. 
Bleib g'sond, erhalt Dir d'Luscht ond d'Kraft, 
ond wenn da d'Zwiebla nemme essa koasch, trensch halt en Zwiebel- S a f t ! 
Viele weitere g'sonde Johr, älles Guate ond a schees Fescht -
des wenschet Dir, liaber [NAME]:
Deine Geburtstagsgäscht !!!



Author/in:        Einsender/in: Ute Bernhart        Datum: